Yangiliklar
Dubayda O'zbekiston biznes kengashi tashkil etildi: asosiy faoliyat yo'nalishlari
Dubay savdo palatalari (Dubai Chambers) ko'magida Dubayda O'zbekiston biznes kengashi faoliyatini boshladi. Kengashning birinchi umumiy yig'ilishi 26-avgust kuni bo'lib o'tdi.
Tadbirda O'zbekiston va Birlashgan Arab Amirliklari ishbilarmon doiralari vakillari, investorlar hamda ikki davlatning yirik kompaniyalari yuqori lavozimli rahbarlari ishtirok etdi. Tashabbus O'zbekiston elchixonasi, Investitsiyalar, sanoat va savdo vazirligi vakolatxonasi hamda o'zbek ishbilarmon hamjamiyati tomonidan ilgari surildi.
Yig'ilishda Kengashning strategik ustuvor yo'nalishlari taqdimoti o'tkazildi, ta'sis hujjatlari imzolandi va bir qator B2B muzokaralar bo'lib o'tdi.
Kengashning asosiy maqsadlari qatorida ikki davlat ishbilarmon doiralari o'rtasida doimiy muloqotni yo'lga qo'yish, o'zbek kompaniyalarining BAA bozoridagi ishtirokini kengaytirish va amirlik investorlarini istiqbolli loyihalarga jalb qilish bor.
Bundan tashqari, Kengash ikki tomonlama savdo va investitsiyalar hajmini oshirish ustida ishlaydi. Dubai Chambers rahbariyatining fikricha, u O'zbekiston va BAA kompaniyalari o'rtasida to'g'ridan-to'g'ri va tizimli biznes aloqalarini rivojlantirish uchun samarali institutsional maydonga aylanishi kutilmoqda.
Investitsiyalar, sanoat va savdo vazirligi ma'lumotiga ko'ra, tadbirda muhokama qilingan asosiy mavzular qatorida ikki tomonlama investitsiyalarni kengaytirish va istiqbolli biznes imkoniyatlari bor. Tomonlar, shuningdek, tajriba va axborot almashinuvini yo'lga qo'yish hamda qo'shma biznes tadbirlarini tashkil etishni rejalashtirmoqda.
Vazirlik ma'lumotlariga ko'ra, hozirda O'zbekistonda ta'sischilari yoki investorlari BAAdan bo'lgan 450 dan ortiq kompaniya faoliyat yuritmoqda, so'nggi uch yilda amirlik investitsiyalarining umumiy hajmi esa 3 mlrd AQSh dollariga yetdi. 2025-yilda O'zbekiston va BAA o'rtasidagi tovar ayirboshlash hajmi 1,2 mlrd AQSh dollarini tashkil etdi.
O'tgan yil yakuniga ko'ra, Dubay savdo palatasida 826 ta faol o'zbek kompaniyasi ro'yxatda bo'lib, bu o'tgan yilga nisbatan 21,3 foiz ko'p. Joriy yilning birinchi yarmida Dubai Chambersga yana 75 ta o'zbek kompaniyasi qo'shildi.
Dubayda O'zbekiston biznes kengashining tashkil etilishi O'zbekiston va BAA o'rtasidagi iqtisodiy hamkorlikni yanada mustahkamlashi, yangi investitsiya imkoniyatlarini ochishi va BAA bozoriga chiqishni istagan o'zbek kompaniyalari uchun qo'shimcha imkoniyatlar yaratishi kutilmoqda.
Trend
Ommabop yangiliklar
Yangi Toshkentda elektromobillarni tezkor quvvatlash stansiyasi ochildi
Yangi Toshkent hududida davlat xizmatchilari va keng jamoatchilik uchun elektromobillarni tezkor quvvatlash stansiyasi ochildi.
O'zbekistonda Markaziy Osiyoda o'z turidagi eng yirik yangi energetika obyektlari ishga tushirildi
O'zbekiston mustaqilligining 35 yilligi munosabati bilan mamlakat bo'ylab umumiy quvvati 2 423 MVt bo'lgan yangi energetika obyektlari foydalanishga topshirildi.
YTB “Yashil Energiya” bilan birgalikda O'zbekistonda yashil infratuzilmani rivojlantirishni qo'llab-quvvatlaydi
Yevroosiyo taraqqiyot banki (YTB) va “Yashil Energiya” QK MChJ qayta tiklanuvchi energetika sohasida hamkorlik qilish to'g'risida o'zaro anglashuv memorandumini imzoladi. Tomonlar O'zbekistonda taqsimlangan quyosh generatsiyasi, elektromobillarni quvvatlash infratuzilmasi va kichik gidroelektr stansiyalari loyihalarini birgalikda moliyalashtirish va amalga oshirishni rejalashtirmoqda.
“Yashil Energiya” MChJ Huawei kompaniyasidan invertorlar xarid qiladi
O'zbekiston Energetika vazirligida milliy qayta tiklanuvchi energiya loyihalari doirasida invertorlar yetkazib berish bo'yicha “Yashil Energiya” MChJ va Huawei kompaniyasi o'rtasida shartnoma imzolash marosimi bo'lib o'tdi.
O'zbekiston energetika sohasida Yevroosiyo taraqqiyot banki bilan hamkorlikni mustahkamlamoqda
2025-yil aprel oyida O'zbekiston Respublikasi Prezidenti mamlakatning Yevroosiyo taraqqiyot bankini (YTB) ta'sis etish to'g'risidagi bitimga qo'shilishi haqidagi qonunni imzoladi. Natijada O'zbekiston Bankning yettinchi a'zosiga aylandi. Ushbu hamkorlik doirasida yaqinda Toshkentda YTBning rasmiy vakolatxonasi ochildi. Bu o'zaro hamkorlikni chuqurlashtirish va qo'shma investitsiya loyihalarini amalga oshirish uchun yangi imkoniyatlar yaratadi.