YTB “Yashil Energiya” bilan birgalikda O'zbekistonda yashil infratuzilmani rivojlantirishni qo'llab-quvvatlaydi

Yevroosiyo taraqqiyot banki (YTB) va “Yashil Energiya” QK MChJ qayta tiklanuvchi energetika sohasida hamkorlik qilish to'g'risida o'zaro anglashuv memorandumini imzoladi. Tomonlar O'zbekistonda taqsimlangan quyosh generatsiyasi, elektromobillarni quvvatlash infratuzilmasi va kichik gidroelektr stansiyalari loyihalarini birgalikda moliyalashtirish va amalga oshirishni rejalashtirmoqda.

Hamkorlik respublikada energetika loyihalari portfelini shakllantirish, zamonaviy raqamli yechimlarni joriy etish hamda davlat va xususiy sektorda yashil energetikaga o'tishni rag'batlantirish uchun servisga asoslangan biznes modelini rivojlantirishni nazarda tutadi.

Aleksey Skatin, YTB boshqaruvchi direktori:

Qayta tiklanuvchi energetika — YTBning O'zbekistondagi ustuvor yo'nalishlaridan biri. Biz taqsimlangan quyosh generatsiyasi va elektromobillarni quvvatlash infratuzilmasida ulkan salohiyat ko'ramiz. “Yashil Energiya” bilan hamkorligimiz ilg'or texnologik va raqamli yechimlarni joriy etishga yordam beradi. Bu respublikaga uglerod neytralligi sari harakatlanish imkonini berib, biznes va aholi uchun yangi imkoniyatlar yaratadi.

Nodirbek Nasretdinov, “Yashil Energiya” QK MChJ bosh ijrochi direktori:

YTB bilan hamkorlik kompaniyamiz uchun yangi sahifa ochadi. Bunday xalqaro moliya institutining ko'magi O'zbekistonning o'sib borayotgan iqtisodiyoti uchun muhim ahamiyatga ega bo'lgan taqsimlangan energetika va quvvatlash infratuzilmasi loyihalarini kengaytirish imkonini beradi. Birgalikda biz respublikaning yashil o'tish va energiya samaradorligi bo'yicha maqsadlariga erishishga real hissa qo'sha olamiz.

“Yashil Energiya” bilan hamkorlik YTBning Markaziy Osiyo uchun energetik o'tish bo'yicha «o'rta yo'l» strategiyasiga mos keladi. Bu an'anaviy generatsiyani modernizatsiya qilishni qayta tiklanuvchi energiya manbalarini faol joriy etish bilan uyg'unlashtiradigan muvozanatli yondashuvdir.

O'zbekiston allaqachon yashil energetika bo'yicha mintaqa yetakchilaridan biri hisoblanadi. Xalqaro tahliliy markaz Ember ma'lumotlariga ko'ra, 2025-yilda mamlakatda elektr energiyasining 12 foizi quyosh va shamol energiyasidan ishlab chiqarilgan. Bu yanada kengroq strategiyaning bir qismi: O'zbekiston 2030-yilga qadar qayta tiklanuvchi energiya manbalarining o'rnatilgan quvvatini 20 GVtga yetkazishni va ularning umumiy generatsiyadagi ulushini 54 foizga chiqarishni rejalashtirmoqda.

Qo'shimcha ma'lumot:

YTB — Yevroosiyo hududiga sarmoya kiritayotgan ko'p tomonlama taraqqiyot banki. 20 yildan buyon Bank a'zo davlatlarda iqtisodiy aloqalarni mustahkamlash va kengaytirish hamda har tomonlama rivojlanishga ko'maklashish yo'lida faoliyat yuritib kelmoqda. 2025-yil dekabr oyi oxiriga kelib YTBning jamlangan portfeli umumiy investitsiyalar hajmi 19,6 mlrd AQSh dollari bo'lgan 326 ta loyihani tashkil etdi. Portfelning asosiy qismini transport infratuzilmasi, raqamli tizimlar, yashil energetika, qishloq xo'jaligi, sanoat va mashinasozlik sohalaridagi integratsion samarali loyihalar tashkil etadi. Bank o'z faoliyatida BMTning Barqaror rivojlanish maqsadlari va ESG tamoyillariga amal qiladi.

YTB 2022–2026-yillarga mo'ljallangan Strategiyasi doirasida uchta megaloyihani amalga oshirmoqda: Yevroosiyo transport tarmog'i, Yevroosiyo qishloq xo'jaligi mahsulotlarini taqsimlash tizimi hamda Markaziy Osiyo suv-energetika kompleksi.