Maqolalar
“Yashil Energiya” kompaniyasi sohadagi eng muhim xalqaro yangiliklarni jamladi.
2026-yil 7–9-oktabr kunlari jahon energetikasida qayta tiklanuvchi energiya, akkumulyatorli energiya saqlash tizimlari — BESS, elektromobillarni quvvatlash infratuzilmasi va korporativ PPA shartnomalari bo‘yicha qator muhim yangiliklar.
“Yashil Energiya” kompaniyasi sohadagi eng muhim xalqaro yangiliklarni jamladi.
1. Janubiy Afrika 4,6 GVt BESS quvvatini xarid qiladi
Janubiy Afrika Respublikasi elektr energetika tizimini barqarorlashtirish maqsadida 4,6 GVt quvvatga ega akkumulyatorli energiya saqlash tizimlarini xarid qilishni rejalashtirmoqda.
BESS qayta tiklanuvchi manbalardan ishlab chiqarilgan ortiqcha elektr energiyasini saqlash va uni kechki yuqori iste’mol vaqtida tarmoqqa uzatish imkonini beradi.
Manba — Janubiy Afrika hukumati
2. Polshadagi birinchi yirik dengiz shamol elektr stansiyasining barcha turbinalari o‘rnatildi
1,1 GVt quvvatli Baltic Power loyihasida 76 ta shamol turbinasini o‘rnatish ishlari yakunlandi. Turbinalarning uchdan biridan ko‘prog‘i allaqachon elektr energiyasi ishlab chiqarmoqda.
Stansiya yiliga qariyb 4 TVt·soat elektr energiyasi ishlab chiqarishi kutilmoqda. Bu Polshaning amaldagi elektr energiyasi iste’molining taxminan 3 foiziga teng bo‘lib, 1,5 milliondan ortiq xonadon ehtiyojini qoplash imkonini beradi.
3. Avstraliyada 2,76 GVt·soatlik ikkita BESS loyihasi rivojlantirilmoqda
Avstraliyaning Kvinslend shtatida Byellee va Belah energiya saqlash loyihalarini amalga oshirish bo‘yicha muhim bosqichga erishildi.
Byellee loyihasining ko‘rsatkichlari 300 MVt/1 160 MVt·soatni, Belah loyihasiniki esa 400 MVt/1 600 MVt·soatni tashkil etadi. Ikki tizimning umumiy quvvati 700 MVt, sig‘imi esa 2 760 MVt·soatga teng bo‘ladi.
4. Teebar BESS loyihasining asosiy pudratchilari belgilandi
Avstraliyadagi Teebar energiya saqlash loyihasi 400 MVt quvvat va 1 600 MVt·soat sig‘imga ega bo‘ladi. To‘rt soat davomida elektr energiyasi uzata oladigan tizim tarmoqdagi yuqori yuklamani kamaytirishga xizmat qiladi.
Enerven kompaniyasi batareyalarni integratsiya qilish, 275 kV kuchlanishli podstansiya va elektr uzatish liniyasini qurish ishlarini amalga oshiradi. Loyihani 2028-yil oxirida tijorat ekspluatatsiyasiga topshirish rejalashtirilgan.
5. Finlandiyada yirik BESS qurilishi boshlanmoqda
Finlandiyadagi Vuolijoki energiya saqlash loyihasining quvvati 125 MVt, sig‘imi esa 250 MVt·soatni tashkil etadi. U mamlakatda qurilayotgan eng yirik BESS loyihalaridan biri bo‘ladi.
Loyiha uchun uskunalarni Sungrow yetkazib beradi, uzoq muddatli moliyalashtirish esa Rabobank tomonidan ta’minlanadi. Mazkur loyiha bilan Nala Renewables kompaniyasining Finlandiyadagi umumiy portfeli 275 MVt/550 MVt·soatga yetadi.
6. Meta bilan PPA quyosh loyihasiga 350 mln dollar jalb qilish imkonini berdi
Zelestra kompaniyasi AQShning Indiana shtatida qurilayotgan 203 MVt quvvatli Reclamation Solar loyihasi uchun 350 mln dollar miqdorida moliyalashtirish jalb qildi.
Stansiya rekultivatsiya qilingan sobiq ko‘mir qazib olish hududida barpo etilmoqda. Loyiha Meta kompaniyasi bilan tuzilgan uzoq muddatli elektr energiyasini xarid qilish shartnomasi — PPA bilan ta’minlangan.
7. Kaliforniya tezkor quvvatlash stansiyalari uchun 28 mln dollar ajratdi
Kaliforniya shtati elektromobillar uchun tezkor quvvatlash infratuzilmasini kengaytirishga 28 mln dollar yo‘naltirdi.
Dastur doirasida har bir doimiy tokda ishlaydigan tezkor quvvatlash porti uchun 100 ming dollargacha xarajat qoplanishi mumkin. Quvvatlash infratuzilmasi yetarli darajada rivojlanmagan hududlarga ustuvorlik beriladi.
Manba — California Energy Commission
8. Avstraliyada shamol va BESSni birlashtirgan yangi loyiha ishlab chiqilmoqda
Balala gibrid energetika loyihasi 420 MVtgacha quvvatga ega shamol elektr stansiyasi va 200 MVt/800 MVt·soatlik BESSni o‘z ichiga oladi.
Loyiha doirasida 60 tagacha shamol turbinasi o‘rnatilishi va mavjud 330 kV kuchlanishli elektr uzatish liniyasiga ulanishi ko‘zda tutilgan. Hozirda loyiha federal ekologik baholash jarayonidan o‘tmoqda.
Manba — Avstraliya EPBC Portal
9. Cargill quyosh va shamol energiyasi bo‘yicha korporativ xaridlarini kengaytirmoqda
Cargill kompaniyasi Sweetland shamol loyihasining 87 MVt quvvati bo‘yicha 12,6 yillik virtual PPA shartnomasini tuzdi. Loyiha yiliga qariyb 392 ming MVt·soat elektr energiyasi ishlab chiqarishi kutilmoqda.
Kompaniya, shuningdek, 85 MVt quvvatli Choctaw Fields quyosh loyihasida ishlab chiqariladigan elektr energiyasining to‘liq hajmini xarid qiladi. Ushbu kelishuvlar shartnomalar amal qiladigan davrda jami 3,3 mln tonnaga yaqin CO₂ ekvivalentidagi chiqindilarni kamaytirishi kutilmoqda.
Manba — Cargill / Business Wire
“Yashil Energiya”: amaliy natijalar
“Yashil Energiya” MChJ QK tomonidan O‘zbekiston bo‘ylab ijtimoiy soha hamda iqtisodiyotning turli tarmoqlariga tegishli 2 000 dan ortiq obyektga quyosh fotoelektr stansiyalari o‘rnatildi.
2026-yilning to‘qqiz oyi yakuniga ko‘ra, kompaniya tomonidan iste’molchilarga yetkazib berilgan elektr energiyasining jami hajmi 216 mln 428 ming kVt·soatni tashkil etdi.
Kompaniya PPA asosida yashil elektr energiyasini yetkazib berish, elektromobillar uchun quvvatlash infratuzilmasini rivojlantirish, shuningdek, kichik va mikroGES loyihalarini amalga oshirish yo‘nalishlarida faoliyat yuritmoqda.
Jahon tajribasi quyosh va shamol generatsiyasi, energiya saqlash tizimlari, PPA shartnomalari hamda quvvatlash infratuzilmasini yagona energetik yechim sifatida rivojlantirish elektr ta’minoti barqarorligi va energiya samaradorligini oshirishda muhim ahamiyat kasb etayotganini ko‘rsatmoqda.